Ministri i Drejtësisë Toni Gogu zhvilloi dje (17 prill) një seri takimesh në Korçë, në kuadër të turit “Punët e Shqipërisë”, ku në fokus ishte lidhja mes zhvillimit ekonomik dhe funksionimit të sistemit të drejtësisë.

Gogu shoqërohej nga Drejtuesi politik i qarkut dhe Kryetar i Kuvendit Niko Peleshi, Kryetari i Bashkisë Sotiraq Filo, Prefektja Florinda Zegullaj dhe Kryetari i Qarkut Petrika Tollkuçi.

Gjatë takimeve me operatorë turistikë, përfaqësues të komunitetit, profesionet e lira dhe qytetarë, Ministri theksoi se rritja e turizmit, vlerësimi i trashëgimisë kulturore dhe rikthimi i diasporës janë tregues pozitivë të zhvillimit të vendit, por kërkojnë një mbështetje të fortë nga shteti i së drejtës.

“Sot pamë dy realitete paralelisht: nga njëra anë një zhvillim real – turizëm që rritet, kulturë që tërheq vizitorë, njerëz që kthehen dhe investojnë; nga ana tjetër, problematika konkrete që lidhen me drejtësinë e përditshme të qytetarëve”, u shpreh Ministri.

Ai nënvizoi se sfidat kryesore mbeten zvarritjet në proceset gjyqësore, vështirësitë në ekzekutimin e vendimeve dhe aksesi i qytetarëve në drejtësi.

Gjatë takimit në Korçë, përfaqësues të komunitetit ligjor ngritën gjithashtu shqetësime konkrete mbi efektet e hartës së re gjyqësore, veçanërisht në lidhje me aksesin e qytetarëve dhe kohëzgjatjen e proceseve, çështje që mbeten në vëmendjen e institucioneve përgjegjëse.

“Qytetarët nuk kërkojnë teori. Kërkojnë që çështjet të mos zvarriten, që vendimet të zbatohen dhe që drejtësia të jetë e aksesueshme për të gjithë,” theksoi ai.

Sipas Ministrit të Drejtësisë, fokusi i punës në vijim do të jetë përmirësimi i funksionimit të sistemit në praktikë, përtej kuadrit ligjor ekzistues.

“Besimi tek shteti nuk ndërtohet me fjalë, por me drejtësi që funksionon çdo ditë,” përfundoi ai.

/rtsh.al/