Ministri Hoxha takohet me Komisioneren Kos, fokusi te përmbyllja e negociatave dhe Plani i Rritjes

Ministri për Evropën dhe Punët e Jashtme, Ferit Hoxha, zhvilloi një takim pune me Komisioneren Evropiane për Zgjerimin, Marta Kos, me fokus ecurinë e procesit të anëtarësimit të Shqipërisë në Bashkimin Evropian dhe hapat e mëtejshëm drejt përmbylljes së negociatave.
Gjatë takimit, palët bënë një bilanc të progresit të arritur pas publikimit të Raportit të Progresit 2026, shqyrtuan udhërrëfyesin e negociatave dhe diskutuan mbi perspektivën e procesit, si dhe ecurinë e zbatimit të Planit të Rritjes për Ballkanin Perëndimor.
Ministri Hoxha vuri theksin te domosdoshmëria që dinamika aktuale e procesit integrues të përkthehet në hapa konkretë. Në një reagim të publikuar në platformën X pas takimit, ai theksoi rëndësinë e vijimit të punës me kapitujt e negociatave.
“Shqipëria ka ndërtuar një vrull të vërtetë. Tani është koha për ta kthyer vrullin në rezultate të matshme, për të vazhduar mbylljen e kapitujve dhe për të transformuar angazhimet në reforma, dhe reformat në anëtarësim”, u shpreh ministri Hoxha.
Bashkëpunimi me institucionet e BE-së në fazën vendimtare
Në vijim të qëndrimit të tij, kreu i diplomacisë shqiptare nënvizoi se koordinimi i ngushtë me institucionet evropiane dhe kryeqytetet e unionit mbetet kyç për ritmin e integrimit.
“Bashkëpunimi i ngushtë me Komisionin Evropian dhe Shtetet Anëtare të BE-së mbetet thelbësor, ndërsa përshpejtojmë zbatimin, përmbushim angazhimet tona dhe përparojmë me vendosmëri në fazën e fundit drejt anëtarësimit në BE”, deklaroi ai.
Në përfundim, ministri Hoxha shprehu mirënjohjen për Komisioneren Marta Kos për mbështetjen e vazhdueshme dhe angazhimin e saj “në mbështetjen e një procesi të besueshëm dhe të bazuar në meritë të zgjerimit që forcon si Shqipërinë ashtu edhe Bashkimin Evropian dhe investon në të ardhmen tonë të përbashkët evropiane”.
/rtsh.al/
Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.
Komentet 0
Ende nuk ka komente. Bëhuni i pari që komenton.




