Ministri rus i Mbrojtjes, Sergei Shoigu ka deklaruar se Rusia nuk ka zgjidhje të tjera veçse të fitojë në Ukrainë.

Shoigu tha se forcat e tij po ruajnë “mbrojtjen aktive” përballë kundërofensive të Ukrainës, ndërsa shtoi se Moska nuk ka zgjidhje tjetër veçse të fitojë.

“Forcat po ruajnë mbrojtjen aktive në frontet e nevojshme, thelbësore. Në disa vende është më e vështirë, në të tjera më e thjeshtë.

Por mund të them se djemtë dhe komandanti po performojnë me besim dhe me siguri po mbrojnë atë që ne duhet të mbrojmë për momentin – ato vende, padyshim, ku forcat e armatosura ukrainase po përpiqen të depërtojnë. Detyra kryesore ishte të rrëzonte armatimin e armikut”, tha ai.

Rusia kontrollon gati një të pestën e territorit të Ukrainës pas më shumë se 18 muajsh lufte, por është detyruar të tërhiqet nga zonat e mëdha që kapi në pushtimin e saj fillestar pranë kryeqytetit Kiev dhe në jug dhe lindje.

Ukraina nisi një kundërofensivë të shumëpritur në qershor që ka rimarrë më shumë se një duzinë fshatra, por është ndërlikuar nga fusha të mëdha të minuara dhe forcat ruse të ngulitura shumë.

/rtsh.al/