Një prej shqetësimeve të ditës për blegtorët është çmimi me të cilin shesin qumështin. Sipas tyre, në një kohë që janë rritur çmimet e nënprodukteve të tij, qumështin fabrikat e përpunimit vijojnë t’ua marrin me çmimin e një viti më parë.

Dule Baho nga fshati Kolonjë i Gjirokastrës që në moshën 10 vjeçare të vetmin profesion që ka bërë është ai i bariut. Tani mbarështon një tufë prej 300 krerësh të imta, por për shkak të raportit të zhdrejtë mes lodhjes dhe fitimit, duket se do e mbyllë vetë këtë profesion që e trashëgoi nga i ati.

Të njëjtin shqetësim ndajnë edhe blegtorët e Fierit dhe Dropullit.

E njohur me këto ministrja e Bujqësisë Frida Krifca ftoi blegtorët në një tryezë dialogu me përpunuesit e qumështit, sektor i cili sipas ministres po kalon vështirësi për shkak të rritjes së çmimeve të lëndëve të para.

Në buxhetin e vitit 2022, Ministria e Bujqësisë ka një fond prej 7.1 miliardë lekë për financimin e zhvillimit rural, nga të cilat 3.2 miliardë lekë mbështetje për 50 mijë fermerë.

/rtsh.al/