Shqipëria synon që viti 2026 të shënojë një kthesë konkrete në rrugëtimin drejt Bashkimit Europian, duke kaluar nga hapja e negociatave tek mbyllja efektive e kapitujve. Ky ishte mesazhi kryesor i përcjellë këtë të enjte nga Ministrja për Evropën dhe Punët e Jashtme, Elisa Spiropali, gjatë takimit me Raportuesin për Shqipërinë në Parlamentin Europian, Andreas Schieder.

Në fokus të diskutimeve ishte marrja e Raportit të Vlerësimit të Standardeve të Ndërmjetme (IBAR), një mekanizëm kyç teknik që zhbllokon fazat e mëtejshme të integrimit.

Rëndësia e IBAR

Spiropali nënvizoi se arritja e piketave të ndërmjetme (IBAR) është momenti vendimtar që pritet këtë vit.

“Diskutuam mbi perspektivën e arritjes sa më parë të piketave të ndërmjetme, si një moment që do t’i hapë rrugën procesit të mbylljes së kapitujve,” u shpreh ministrja pas takimit. Sipas saj, ky hap do ta vendosë Shqipërinë e vitit 2026 në një fazë të re, “edhe më konkrete dhe më të matshme në rrugën drejt anëtarësimit”.

Reformat dhe sundimi i ligjit

Takimi me eurodeputetin Schieder, i njohur si mbështetës i procesit të zgjerimit, shërbeu gjithashtu për të bërë një bilanc të reformave. Palët ndanë vlerësime pozitive për ecurinë e deritanishme, me theks të veçantë te reformat në fushën e sundimit të ligjit dhe të drejtave themelore – dy shtyllat kryesore që diktojnë ritmin e negociatave.

Ministrja theksoi “angazhimin e palëkundur të politikës sonë të jashtme me atë të BE-së, si dhe përafrimin e vazhdueshëm me vlerat dhe qëndrimet e Unionit”.

Spiropali e cilësoi takimin si “miqësor dhe përmbajtësor”, duke vlerësuar rolin e Parlamentit Evropian jo vetëm si monitorues, por edhe si orientues i hapave të mëtejshëm në këtë proces historik për vendin.

/rtsh.al/