Kryeministri i Greqisë, Kyriakos Mitsotakis i ka dërguar një mesazh nga Praga presidentit turk, pas përfundimit të Samitit joformal të BE. Mitsotakis i bëri thirrje Erdogan që të ndryshojë kurs nëse dëshiron të ketë një marrëdhënie më të ngushtë me BE-në, duke e paralajmëruar presidentin turk se në të kundërt nuk do të gjejë asnjë aleat.

Kryeministri grek ritheksoi se asnjë sfidë nuk do të mbetet pa përgjigje dhe nënvizoi se vënia në pikëpyetje e sovranitetit grek mbi ishujt e Egjeut duhet të ndalet.

I pyetur nëse Greqia do të arrijë në pikën që të kërkojë vendosjen e sanksioneve ndaj Turqisë, ai tha se shpreson se kjo nuk do të jetë e nevojshme.

Me tone të larta ka folur në Samit edhe presidenti turk Rexhep Tajip Erdogan.

“Jo vetëm për Greqinë, por për çdo vend që na sulmon, përgjigja jonë është gjithmonë: Papritmas, mund të vijmë natën. Ata duhet ta dinë këtë. Turqia nuk ka pasur asnjëherë ambicie për territorin apo sovranitetin e asnjë vendi. Ne po luftojmë vetëm për të mbrojtur interesat e vendit tonë dhe të turqve qipriotë”, tha presidenti turk.

Sipas mediave greke, Ankaraja po përshkallëzon provokimet dhe tashmë po përgatitet të çojë platformën e re të shpimit ” Abdulhamit Khan ” në Mesdheun Lindor./ CNN.gr

/rtsh.al/