Muaji gusht shënon rritje të ndjeshme të numrit të udhëtarve drejt të Durrësit, pasi  një pjesë e mirë e emigrantëve planifikojnë t’i kalojnë pushimet në vendlindje. 
Burime nga Autoriteti Portual Durrës bëjnë të ditur se për periudhën 1-11 gusht  janë regjistruar afro 60 400  udhëtarë në hyrje dhe mbi 24 200 udhëtarë në ikje drejt porteve italiane. 
Ndërsa deri në fund të këtij muaji shqiptarët që duan të udhëtojnë drejt Italisë për turizëm, duhet të jenë të vaksinuar me të dyja dozat, me një nga vaksinat e njohura nga Agjencia Evropiane e Barnave ose të paraqesin testin negativ. Në çdo rast janë të detyruar të bëjnë 5 ditë vetëkarantinim.
Edhe këtë vit numri më i madh i personave që vijnë nga jashtë për pushime në Durrës vazhdon të mbahet nga shqiptarët e Kosovës, ndërsa më pas janë turistë nga vendet e lindjes si Polonia e Çekia. Shumë turistë kanë ardhur edhe nga Serbia.
Lidhur me preferencat e shqiptarëve për destinacionet jashtë vendit, Antalia në Turqi dhe Egjipti vazhdojnë të jenë në vend të parë e pas tyre vijnë Greqia dhe Spanja si dy shtetet që u hapën tërësisht për turistët.