Për ndarjen nga jeta të ish presidentit Bujar Nishani ka reaguar edhe Presidenti Ilir Meta, i cili shpreh ngushëllimet për familjarët. Meta shkruan se Nishani do të mbahet mend si një personalitet me vlera të rralla dhe për kontributin e tij për një Shqipëri më demokratike.

“Me trishtim dhe hidhërim të thellë mora lajmin e largimit nga jeta të Presidentit Bujar Nishani. Ngushëllimet më të ndjera për bashkëshorten Odeta, fëmijët Ersi dhe Fiona, dhe të afërmit për këtë humbje të madhe! Presidenti Nishani do të kujtohet gjithnjë si një personalitet me vlera të rralla të një udhëheqësi me integritet dhe vizion. Kontributi i tij për Shqipërinë dhe demokracinë do të kujtohet përherë me respekt. I paharruar kujtimi i President Nishanit! Të prehet në paqen e merituar!’ shkruan Meta.

Bujar Nishani ndërroi jetë në moshën 58 vjeçare, i shtruar në një spital në Gjermani. Ai vuante nga një sëmundje autoimune e mëlçisë dhe pasojat që i la COVID-19 përkeqësoi gjendjen e tij.

/rtsh.al/