Sheshi qendror i qytetit të Lushnjës është kthyer në qendrën e festës dhe gjallërisë gjatë netëve të ngrohta të verës. Së fundmi është organizuar një aktivitet festiv muzikor që ka mbledhur me qindra qytetarë të të gjitha moshave.

Aktiviteti ” Nete vere dhe muzike”, solli në skenë këngëtarë të njohur e të dashur lushnjarë, si dhe artistë të ftuar, të cilët elektrizuan atmosferën me interpretimet e tyre.

Përveç duartrokitjeve të shumta nga qytetarët, vetë artistët e ngjitur në skenë shprehën gëzimin e tyre për rikthimin pranë publikut lushnjar. Repertori i tyre përfshinte nga këngët tradicionale e popullore të zonës deri te muzika moderne verore.

Banorë të qytetit, familjarë, të rinj, por edhe bashkëatdhetarë të kthyer për pushime, u mblodhën ne shesh duke e kthyer këtë mbrëmje në një festë të vërtetë komunitare.

Sheshi u gjallërua nga duartrokitjet, nga këngët e kënduara në kor dhe nga  energjia pozitive që zgjati deri në orët e vona të mbrëmjes.

Këto aktivitete verore po kthehen në një traditë të bukur për qytetin, duke i dhënë Lushnjës më shumë jetë artistike dhe hapësirë argëtimi për të gjithë qytetarët e saj gjatë sezonit festiv.

/rtsh.al/