Ngrohja globale ka sjellë probleme të shumta në sektorin e bujqësisë. Në rrethana të tilla dy janë problemet kryesore, vaditja dhe trajtimi i kulturave bujqësore në veçanti i drufrutorëve. Specialisti i bujqësisë, Arben Dulellari thotë se ngrohja globale ka sjellë kosto të shtuar tek fermerët, kjo edhe për atë sepse për të marrë prodhimin e pritshëm janë të detyruar të vadisin më shumë si dhe të shtojnë numrin e trajtimeve me spërkatje të kulturave të ndryshme bujqësore, por edhe të frutikulturës.

Ndryshimi i kushteve klimaterike, sipas Dulellarit, ka sjellë në vite të veçanta edhe uljen e numrit të bimëve për sipërfaqe.

Ndryshimet e forta të klimës kanë sjellë edhe shfaqjen e sëmundjeve të pahasura më parë në fushën e Maliqit dhe atë të Korçës, kryesisht tek bishtajoret dhe misri.

Drejtori i Buqësisë në Bashkinë e Maliqit, Arben Dulellari është i mendimit se në kushte të tilla të ngrohjes globale fermerët duhet të ndryshojnë kultivarët të cilët janë më rezistent në rrethanat e krijuara.

Kulturat kryesore në fushën e Maliqit janë gruri, misri, qepa, patatja si dhe bishtajoret. Në fshatrat e njësisë administrative Pirg, ka sipërfaqe të mëdha të mbjella edhe me mollë. Kultura këto që edhe për specialistët vitet e fundit kanë kërkuar trajtime shtesë, duke çuar në rritjen e kostos së prodhimit.

/rtsh.al/