Kandidatët për kryetar të Himarës, socialisti Vangjel Tavo dhe rivali opozitar Petraq Gjikuria, iu bashkuan të hënën monitorimit nga afër të procesit që do shpallë fituesin mes tyre.

Grupet e numërimit e nisën vonë punën, pas mesnatës, për shkak të vonesave në mbërritjen e kutive nga qendrat e votimit, por edhe prej trajnimit paraprak.

Kutitë e para u hapën pas orës 00:35, më shumë se 5 orë e gjysmë pasi u mbyllën votimet.

Fleta e parë e votimit, nga zona e Piqerasit, shkoi për z. Tavo.

Komisioni Qendror i Zgjedhjeve trajnoi anëtarët e grupeve të numërimit të angazhuar për zgjedhjet e pjesshme në Himarë. 8 grupet e trajnuara të numërimit u vendosën sipas radhës në 4 tavolina numërimi, për të administruar fletëvotimet nën kamerat monitoruese/regjistruese të instaluara posaçërisht.

“Ajo që vihet re është një lloj harmonie. Të dy kandidatët janë pranë njëri-tjetrit me gjithë shoqëruesit e tyre, madje shpeshherë janë parë duke shkëmbyer biseda,” raportoi për RTSH 24 gazetarja Afrovita Hysaj.

Në këto zgjedhje, KQZ-ja aplikoi vetëm identifikimin elektronik të zgjedhësve në 36 qendrat e votimit.

QV-të u hapën në orën 07:00 pa problematika dhe procesi i votimit përfundoi i qetë deri në orën 19:00.

Zgjedhjet në Himarë erdhën pasi KQZ i hoqi mandatin Fredi Belerit.

Nga përllogaritjet e Komisionit Qendror të Zgjedhjeve rezulton se deri në orën 19:00 votuan 8.678 zgjedhës në 36 qendrat e votimit që ka Himara. Kjo shifër përkthehet në 37.61%, më e lartë sesa në zgjedhjet e 14 majit 2023, kur pjesëmarrja ishte 34.27% me 7.821 votues gjithsej.

Rezultatet pas numërimit të kutive (në kohë reale në KQZ)

Ka nisur procesi i numërimit në KZAZ nr. 88 në stadiumin e Himarës. Nga kutitë e para nga 36 qendrat e votimit në total:

Total: 5.022 vota Vangjel Tavo (58.62%) / 3.545 vota Petraq Gjikuria (41.38%) / 124 vota të pavlefshme

• Himarë: 2.132 vota Vangjel Tavo (46.11%) / 2.462 vota Petraq Gjikuria (53.59%) / 74 vota të pavlefshme
• Hore Vranisht: 1.165 vota Vangjel Tavo (89.20%) / 141 vota Petraq Gjikuria (10.80%) / 20 vota të pavlefshme
• Lukovë: 1.725 vota Vangjel Tavo (64.68%) / 942 vota Petraq Gjikuria (35.32%) / 30 vota të pavlefshme

/rtsh.al/