Shefi i OKB-së, Antonio Guterres tha sot se dëmtimi i termocentralit bërthamor të Zaporizhzhia në Ukrainë, të pushtuar nga Rusia, do të ishte “vetëvrasje”. Duke folur me gazetarët pas bisedimeve në Lviv, Guterres thotë se ishte “shumë i shqetësuar” për situatën në uzinë, duke shtuar se duhet çmilitarizuar. 

Guterres shton se objekti nuk duhet të përdoret si pjesë e “ndonjë operacioni ushtarak” dhe se “marrëveshja nevojitet urgjentisht për të rivendosur infrastrukturën civile në Zaporizhzhia, për të garantuar sigurinë e zonës”. 

Ndërsa presidenti i Turqisë, Rexhep Tajip Erdogan, tha se bota nuk dëshiron “një Çernobil tjetër”, duke paralajmëruar për mundësinë e një aksidenti bërthamor në Zaporizhzhia, nëse konflikti vazhdon atje. Komentet ai i bëri në një konferencë shtypi në Lviv, pas bisedimeve me homologun e tij ukrainas, Volodymyr Zelensky dhe shefin e OKB-së, Antonio Guterres. 

Erdogan tha se treshja diskutoi mbi mënyrat për t’i dhënë fund luftës midis Rusisë dhe Ukrainës. Ai thotë se ata diskutuan për shkëmbimin e robërve të luftës midis Ukrainës dhe Rusisë.  Turqia kohët e fundit ka vepruar si ndërmjetëse midis dy vendeve, duke përfshirë çështjen e zhbllokimit të eksporteve të grurit nga portet e Ukrainës. BBC

/rtsh.al/