Fillon sot (1 shtator) në Beograd Panairi i Verës, si pjesë e iniciativës “Open Balkans”.  Organizatorë të panairit janë Oda Ekonomike e Serbisë, Panairi i Beogradit dhe Unioni i Vreshtarëve dhe Verëbërësve të Serbisë, i cili do të mbahet nën kujdesin e vendeve të Ballkanit të Hapur.

Panairi i parë ndërkombëtar i verërave “Wine Vision of the Open Balkans”, nën kujdesin e qeverive të Serbisë, Maqedonisë së Veriut dhe Shqipërisë si pjesë e nismës Open Balkans, do të hapet në prani të Presidentit të Serbisë Aleksandër Vuçiç dhe kryeministrit Edi Rama, kryeministrit të Maqedonisë së Veriut Dimitar Kovaçevski . Hapja zyrtare e panairit, e cila do të zgjasë deri më 4 shtator, është planifikuar në ora 13:00 në sallën 1 të Panairit të Beogradit.

Po ashtu, në këtë takim të radhës të “Open Balkan” pritet që të firmohen marrëveshjet për të hequr kufizimet për tregtimin e produkteve ushqimore. Sipas marrëveshjeve Shqipëria të furnizojë me qymyr Serbinë dhe Maqedoninë e Veriut që ato të prodhojnë energji elektrike brenda rajonit në kushtet e krizës energjetike, ndërsa ato do të heqin kufizimet për të furnizuar Shqipërinë me grurë, misër dhe vaj me kushtin që këto produkte të mos rishiten në treg tjetër.