Me fokus ecurinë e procesit të zgjedhjeve të brendshme në parti, Partia Socialiste do të mbledhë këtë pasdite Asamblenë Kombëtare, e cila do të jetë nga interneti.

Aktiviteti pritet të nisë me fjalën e kryetarit socialist Edi Rama dhe do të vijojë me një raport të Sekretarit të Përgjithshëm Blendi Klosi.

Këtë e njoftoi kreu i grupit parlamentar socialist Bledi Çuçi në mbledhjen më të fundit të radhës.

Veç asamblesë, Çuçi i diskutoi me deputetët socialistë axhendën e javës së re dhe projektligjet që shkojnë në seancën plenare, e cila do të mbahet ditën e mërkurë, datë 12 qershor.

Krahas raportimit të veprimtarisë vjetore të Komisionerit për Mbikëqyrjen e Shërbimit Civil, raportit të ILDKPKI, pritet të diskutohet edhe projektligji për një ndryshim në aderimin e Shqipërisë në Konventën e Aviacionit Civil Ndërkombëtar. 

Mbledhja e Asamblesë do të zhvillohet një ditë para kremtimit të 33-vjetorit të krijimit të Partisë Socialiste.

Gazeta: Jonela Sagajeva

/rtsh.al/