Kreu i Partisë Demokratike i zgjedhur nga Rithemelimi, Sali Berisha ka zbardhur detaje nga takimi që ka zhvilluar sot me kreun e Partisë së Lirisë, Ilir Meta.

Bashkëpunimi elektoral dhe parlamentar kanë qenë në fokus të bisedës, ka bërë me dije Berisha, i cili shton se palët diskutuan edhe për koordinimin e përpjekjeve “për mbrojtjen e interesave të qytetarëve shqiptarë nga regjimi i Edi Ramës”.

Pjesë e takimit kanë qenë edhe deputetët Flamur Noka dhe Petrit Vasili.

“Së bashku me sekretarin e përgjithshëm të PD, Flamur Noka, zhvilluam një takim me kryetarin e Partisë së Lirisë, ish Presidentin Ilir Meta dhe kryetarin e grupit parlamentar të kësaj partie, Dr. Petrit Vasili. Në këtë takim u diskutua gjerësisht për koordinimin e përpjekjeve tona të përbashkëta për mbrojtjen e interesave të qytetarëve shqiptarë nga regjimi i Edi Ramës. Bashkëpunimi elektoral, parlamentar dhe në të gjitha fushat ishin çështje për të cilat u diskutua me frymë të plotë mirëkuptimi”, shkruan Berisha.

Ky takim vjen 2 javë para mbajtjes së protestës së paralajmëruar prej tyre më 6 dhjetor, ditë që përkon me mbajtjen në Tiranë të Samitit BE-Ballkani Perëndimor. Kjo është kritikuar jo pak nga maxhoranca, që e kanë cilësuar mbajtjen e protestës në këtë datë si “turp” dhe një veprim kundër BE.

/rtsh.al/