Tre ushtarë izraelitë kanë mbetur të vdekur pas një sulmi me armë pranë kufirit me Egjiptin, kur një person i armatosur i veshur me uniformën e policisë egjiptiane ka hapur zjarr kundrejt tyre.

Ushtria izraelite bëri të ditur se një polic egjiptian qëlloi dhe vrau dy ushtarët. Sipas ushtrisë izraelite oficeri egjiptian dhe një ushtar i tretë izraelit u vranë në një konfrontim brenda territorit Izraelit disa orë më vonë.

Ushtria egjiptiane ka shpjeguar se një roje kufitare egjiptiane kaloi pengesën e sigurisë kufitare dhe shkëmbeu zjarr me forcat izraelite ndërsa po ndiqte trafikantët e drogës.

“Një anëtar i forcave të sigurisë ndoqi kontrabandistët e drogës dhe gjatë ndjekjes, agjenti i sigurisë kaloi gardhin kufirin dhe përfundoi në një përplasje me armë” thuhet në deklaratë.

Incidenti ndodhi pranë kalimit kufitar Nitzana dhe Al-Awja midis Izraelit dhe Egjiptit, 40 km në juglindje të pikës ku kufiri i Izraelit me Egjiptin dhe Rripin e Gazës bashkohen.

Dy nga ushtarët u gjetën të vdekur në një post ushtarak izraelit pasi nuk iu përgjigjën radiove të tyre. Ushtria izraelite tha se një nga ushtarët e vrarë ishte grua. Një ushtar i katërt u plagos lehtë dhe u dërgua në spital.

“Gjatë përplasjes me person të armatosur në territorin izraelit ndodhi edhe shkëmbimi i zjarrit. Trupat dhe komandantët qëlluan dhe vranë personin e armatosur”, tha ushtria izraelite, transmeton Al Jazeera. 

Ministri i Mbrojtjes i Izraelit, Yoav Gallant tha se ai kreu një vlerësim të situatës me shefin e shtabit dhe ushtria do të hetojë ngjarjen.

/rtsh.al/