Koreja e Veriut lëshoi ​​të paktën një raketë balistike sot në mëngjes, njoftuan burime zyrtare nga Koreja e Jugut dhe Japonia.

Shefi i Shtabit të Përgjithshëm të Koresë së Jugut (JCS) tha se një raketë u lëshua nga Sinpo, në bregun lindor të Koresë së Veriut në Detin Lindor, i njohur gjithashtu si Deti i Japonisë.

Kryeministri japonez Fumio Kishida theksoi se dy raketa balistike u lëshuan nga Pheniani, raportoi agjencia Kyodo.

”Nuk raportohet për viktima apo dëme dhe raketat duket se kanë rënë tashmë”, tha një zëdhënës i qeverisë i cituar nga Kyodo.

Lëshimi erdhi pasi Koreja e Veriut dhe Koreja e Jugut rivendosën linjat e tyre të drejtpërdrejta të komunikimit në fillim të këtij muaji.

Linjat e telefonit dhe faksit janë thelbësore për komunikimin midis dy vendeve, të cilat teknikisht nuk i kanë ndërprerë armiqësitë që nga Lufta e Koresë dhe nuk kanë ambasada në kryeqytetet e tyre përkatëse, Phenian dhe Seul.

Koreja e Veriut, subjekt i sanksioneve ndërkombëtare për shkak të programit të saj të armëve bërthamore, kohët e fundit ka shkaktuar tensione të reja me testet e reja të raketave./ATSH