Ministrat e Ballkanit Perëndimor kanë rënë dakord për udhëtimin e lirë pa viza, por vetëm me kartë ID midis gjashtë vendeve dhe për njohjen reciproke të diplomave universitare dhe kualifikimeve profesionale, duke hedhur një hap drejt anëtarësimit në BE.

Ministrja e Jashtme gjermane, Annalena Baerbock, tha se këto marrëveshje hapin rrugën për krijimin e një tregu të përbashkët rajonal të Ballkanit Perëndimor.

“Vendet e Ballkanit Perëndimor kanë vendosur të lidhin tre marrëveshje kyçe. Në këto kohë, kur është e lehtë të humbësh shpresën, konferenca e sotme ishte një shenjë shprese dhe bashkimi. Çfarë do të thotë konkretisht për Ballkanin Perëndimor : Njerëzit e gjashtë vendeve të Ballkanit Perëndimor mund të udhëtojnë midis vendeve të tyre pa viza – Universitetet e të gjashtë vendeve njohin diplomat e njëri-tjetrit, punëdhënësit njohin kualifikimet e njëri-tjetrit”, shkruhet në faqen zyrtare në Twitter të Ministrisë së Jashtme gjermane.  

Marrëveshjet do të nënshkruhen zyrtarisht në një Samit të Ballkanit Perëndimor në Berlin në nëntor.

/rtsh.al/