Partia Socialiste ka paditur në Gjykatën Administrative të Apelit Tiranë, Komisionin Qendror të Zgjedhjeve, pasi sipas saj nuk po miraton afatet procedurale që lidhen me organizimin e zgjedhjeve të pjesshme për kryetar në Bashkinë Himarë.

Zgjedhjet e pjesshme në Himarë do të zhvillohen më 4 gusht 2024, por Komisioni Rregullator në mbledhjen e fundit nuk arrti dakordësinë që të miratonte afat procedurale.

Këtë të hënë (15 korrik) në orën 12.00 në ambientet e Gjykatës Administrative të Apelit do të hidhet shorti për përcaktimin e trupit gjykues për gjykimin e kërkesëpadisë së PS.

“Kundërshtim ndaj mosmarries vendim nga Komisioni Rregullator në KQZ, “Për miratimin e disa afateve procedurale që lidhen me zgjedhjet e pjesshme për kryetar në Bashkinë Himarë, që do të zhvillohen më datë 4 gusht 2024”. Detyrimin e Komisionit Rregullator në KQZ për të marrë menjëherë vendim “Për miratimin e disa afateve procedurale që lidhen me zgjedhjet e pjesshme për kryetar në Bashkinë Himarë, që do të zhvillohen më datë 4 gusht 2024”, thuhet në kërkesëpadinë e PS.

Në mbledhjen e 9 korrikut, Komisioni Rregullator në KQZ nuk arriti dakordësinë për miratimin e afateve procedurale për organizmin e zgjedhjeve të pjesshme në Himarë.

Debatet nisën kur anëtari Muharrem Çakaj tha se dekreti i Begajt për shpalljen e zgjedhjeve më datë 4 gusht është i pavlefshëm pasi duhej pritur të kaloni afati për ankimin e vendimmarrjes së KQZ. Nga ana tjetër përfaqësuesi i PS në KQZ, Eridian Salianji tha se Komisioni rregullator po tejkalon kompetencat duke gjykuar një vendim të KQZ për heqjen e mandatit dhe dekretin e Presidentit për shpalljen e zgjedhjeve, duke thënë se janë në kufijtë e shpërdorimit të detyrës.

Sipas projektvendimit, fushata zgjedhore për zgjedhjet e pjesshme për Kryetarin e Bashkisë Himarë është parashikuar të fillojë më datë 26 korrik 2024, ndërsa partitë duhet të regjistrohen deri në datën 15 korrik.

/rtsh.al/