Presidenti Vladimir Putin tha të premten se numri i sulmeve kibernetike ndaj Rusisë nga “strukturat shtetërore” të huaja ishte rritur disa herë dhe se Rusia duhet të forcojë mbrojtjen e saj kibernetike duke reduktuar përdorimin e softuerëve dhe pajisjeve të huaja, shkruan Reuters.

Faqet e internetit të shumë kompanive shtetërore dhe uebsajteve të lajmeve kanë pësuar përpjekje sporadike hakerimi që kur Rusia dërgoi forcat e saj të armatosura në Ukrainë më 24 shkurt, shpesh për të treguar informacione që janë në kundërshtim me linjën zyrtare të Moskës për konfliktin.

 “Po bëhen përpjekje të synuara për të çaktivizuar burimet e internetit të infrastrukturës kritike të informacionit të Rusisë”, tha Putin, duke shtuar se mediat dhe institucionet financiare ishin shënjestruar.

“Sulme të rënda janë nisur kundër faqeve zyrtare të agjencive qeveritare. Përpjekjet për të depërtuar ilegalisht në rrjetet e korporatave të kompanive kryesore ruse janë gjithashtu shumë më të shpeshta,” tha ai.

Në një takim me Këshillin e Sigurimit, Putin tha se Rusia do të duhet të përmirësojë sigurinë e informacionit në sektorët kyç dhe të kalojë në përdorimin e teknologjisë dhe pajisjeve vendase.

Moska ka kërkuar prej kohësh të përmirësojë infrastrukturën e saj vendase të internetit, madje duke u shkëputur nga interneti global gjatë testeve verën e kaluar.

Megjithatë, breshëria e paprecedentë e sanksioneve perëndimore të vendosura në përgjigje të fushatës ushtarake të Moskës në Ukrainë ka rritur presionin për t’i bërë sistemet ruse të IT-së më elastike. (Sipas Reuters)