Këshilli i Ministrave ka miratuar disa ndryshime në listën e pronave shtetërore që janë në përgjegjësi administrimi të Ministrisë së Punëve të Brendshme. Ky vendim synon përditësimin e të dhënave teknike dhe hartografike për një sërë objektesh strategjike të Policisë së Shtetit dhe forcave speciale.

Përditësimi i përmasave për 17 objekte

Sipas vendimit të zbardhur, janë zëvendësuar përmasat dhe planrilevimet për 17 pasuri të paluajtshme, duke reflektuar matjet e reja në terren. Ndër objektet kryesore që preken nga ky përditësim janë:

Drejtoritë e Policisë: Gjirokastër, Korçë, Lezhë dhe Drejtoria Qendrore Dibër.

Komisariatet dhe stacionet: Pukë, Mallakastër, Pogradec, Rrëshen, si dhe stacionet në Manzë, Patos dhe Fushë-Krujë.

Forcat Speciale, repartet e FNSH-së në Fier (752) dhe Plasë (754).

Asete të tjera, Helioporti, Kampi i Riedukimit Çekrez dhe Posta e Policisë Selenicë.

Shkurtimi i listës së inventarit

Përveç përditësimit të përmasave, qeveria ka vendosur të heqë nga lista e administrimit të ministrisë dy objekte:

Posta e Policisë Drini i Zi

Posta e Policisë Qukës

Sipas vendimit, Agjencia Shtetërore e Kadastrës (ASHK) dhe Ministria e Punëve të Brendshme janë ngarkuar që të pasqyrojnë këto ndryshime në regjistrat përkatës kadastralë.

/rtsh.al/