Kryeministri Edi Rama ka deklaruar se nuk ka paralajmëruar shpalljen e asnjë personi “non-grata” nga Shtetet e Bashkuara të Amerikës. Në një postim në Twitter, Rama shkruan se me deklaratën e bërë në Kuvend më 2 mars, sipas tij, thjeshtë ka kujtuar se politika amerikane nuk është “muhabet leku siç e bëjnë nongratat”.

“Nuk kam paralajmëruar asnjë nongrata! Thjesht kam kujtuar se politika e amerikane nuk është muhabet leku, gjize dhe byreku siç e bëjnë non-gratat e Tiranës, po qasje strategjike që as varet as ndryshon nga retë në pantallonat e gjelave të katundit tonë politik! Normal që vazhdon”, shkruan Rama.

Reagimi i kreut të qeverisë vjen pas komentit të tij nga foltorja e Kuvendit, ku duke iu përgjigju akuzave të opozitës për shpalljen “non-grata” të Berishës, ai tha se këta të fundit e konsiderojnë Departamentin Amerikan të Shtetit “si një byrektore që furnizohen nga unë dhe gjiza ime”.

Në vazhdën e kësaj batute, Rama shtoi se “byrektorja” vazhdon punën dhe se po “shtrohet brumi për tavën që pret të hy në furrën e rindezur”. “Personin në fjalë do ta shihni vetë”, u shpreh Rama.

/rtsh.al/