Kryeministri socialist Edi Rama ka deklaruar se qeveria shqiptare po bën të pamundurën që rritja e çmimeve të karburanteve të mos reflektohet në rritjen e çmimeve, ndërsa sipas tij një rritje pagash do të sillte falimentimin e ekonomisë si në kohën e Sudes.

Duke ju përgjigjur shqetësimeve të qytetarëve në rrjetet sociale se rritja çmimeve të karburanteve duhet të sillte rritjen e pagash ai shkruan:

“Rritja e çmimeve është një problem i përgjithshëm sot, mjafton të shihni Kosovën për të mos shkuar me larg, ndërkohë që siç kam premtuar ne po mbajmë me shumë kosto për buxhetin, mburojën mbi çmimin e energjisë për konsumatorët familjare e biznesin e vogël, qe kudo ka kërcyer e po kërcen lart” shkruan Kryeministri.

Ndërsa në lidhje me rritjen e rrogave, Rama tha se ato nuk mund të rriten sipas dëshirës pasi do të sillte falimentimin si në kohën e Sudes.

“Sa për rrogat ato janë rritur e do vazhdojnë të rriten, por rritja e rrogave nuk behet sipas dëshirës sonë, pasi unë i pari do doja t’i rrisja menjëherë te gjitha, por çdo rritje jashtë mundësive, do të thotë falimentim total në pak muaj si në kohën e Sudes, prandaj duhet pune e durim, për t’u ngjitur me këmbë ne toke s’ka asnjë rruge tjetër të sigurtë” shkruan zoti Rama.

Dy ditët e fundit, çmimet e karburanteve, benzinës dhe naftës  në Shqipëri po shkojnë drejt 200 lekë për litër. Egziston frika se kjo mund të shkaktojë reksion zinxhir në rritjen e përgjithshme të çmimeve.