Në qytetin e Shkodrës ka nisur një aksion për lirimin dhe pastrimin e hapësirave të jashtme rreth shkollës “Mati Logoreci”. Ndërhyrja synon rehabilitimin e zonës rrethuese të këtij institucioni arsimor përmes largimit të objekteve pa leje dhe mbetjeve të inerteve.

Lajmi është bërë me dije nga Kryeministri Edi Rama përmes një postimi në rrjetet sociale, ku në qendër të aksionit është rikthimi i këtyre ambienteve në shërbim të komunitetit arsimor.

“Çlirimi i hapësirave të Shkollës ‘Mati Logoreci’ në Shkodër”, është shprehur kreu i qeverisë.

Aksioni në terren dhe objektivat e bashkisë

Për detajet e ndërhyrjes ka reaguar edhe Kryetari i Bashkisë Shkodër, Benet Beci. Përmes një deklarate në rrjetet sociale, Beci sqaroi se puna po përqendrohet në pastrimin e plotë të territorit pas shembjes së ndërtimeve informale.

“Pas prishjes së objekteve pa leje që prej vitesh kishin zënë hapësirën e shkollës, po punohet për largimin e mbetjeve dhe pastrimin e plotë të zonës së liruar,” deklaroi Beci.

Kreu i bashkisë bëri me dije se punimet do të vijojnë pa ndërprerje me qëllim që hapësira të jetë e gatshme për përpunim të mëtejshëm në fillim të javës.

“Puna do të vijojë gjatë gjithë fundjavës, edhe të dielën, me një objektiv të qartë: të hënën, nxënësit ta gjejnë hapësirën të liruar dhe të pastruar. Më pas vijojmë me sistemimin e saj, për t’ia rikthyer plotësisht shkollës dhe nxënësve. Vazhdojmë punën!”, përfundoi ai.

Projekti parashikon që pas fazës së pastrimit të nisë sistemimi urban i hapësirës së liruar për përdorim nga nxënësit.

/rtsh.al/