Çmimet e karburanteve kanë qenë sot në epiqendër të deklaratave të opozitës kundër qeverisë. Pas deputetit të PL-së, Petrit Vasili, ka qenë edhe deputeti i “Rithemelimit” të PD-së, Luçiano Boçi, ai që ka  hedhur akuza ndaj rritjes së çmimeve të karburantit, duke i cilësuar ato si “një metodë e qeverisë për të vjedhur qytetarët”.

Boçi, në një postim në rrjetin e tij social FB, ka sqaruar se këto çmime janë një zhvatje për qytetarët dhe emigrantët nga ana e qeverisë. Deputeti i PD-së komenton se ka një arsye themelore që çmimi i naftës në Shqipëri rritet e nuk u ul asnjëherë, përkundrejt rënies së tij në bursa.

“Arsyeja është sa e thjeshtë aq edhe kanibaleske. Kjo është periudha kur sasia e mjeteve në qarkullim dyfishohet dhe kërkesa për karburant gjithashtu, sepse emigrantët e shumtë kthehen në vendlindje dhe me pushime. Grabitqari këtë rast pret për të sulmuar prenë e vet. Rama këtë ka pritur për të rrjepur emigrantët e qytetarët! E shndërron sentimentin njerëzor të mallit për vendin, në mall për fitimin e vet marramendës.

Me keq se e turpshme! Kështu, biznesi i tij qeverisës, arkëton miliona euro nga xhepat e njerëzve që i kanë me djersë e gjak, por që dihet si përfundojnë. Përfundojnë në llogaritë e qeveritarëve dhe “bosave” të PPP-ve. Ndërkohë, oligarkët e karburanteve marrin pjesën e tyre me një fitim marramendës. Ndërsa ata që zhvaten, grabiten më shumë me borde e pa borde, janë ata që nuk firmosin në asnjë bordero të bordellos-shtet, emigrantët patriotë dhe çdo qytetar i thjeshtë i këtij vendi.”- shkruan Boçi.

/rtsh.al/