Moska deklaroi se ka arrestuar një shtetas francez të akuzuar për mbledhjen e informacionit në lidhje me aktivitetet ushtarake të Rusisë dhe dështimin për t’u regjistruar si “agjent i huaj”.

“Informacione të tilla, nëse merren nga burime të huaja, mund të përdoren kundër sigurisë së shtetit”, tha Komiteti Hetues i Rusisë (SK).

Zyra postoi gjithashtu pamje që dyshohet se tregonin arrestimin e të dyshuarit të paidentifikuar në një kafene në Moskë. Një OJQ me bazë në Zvicër më vonë tha se këshilltari i saj, Laurent Vinatier u mbajt në kryeqytetin rus.

“Ne jemi të vetëdijshëm se Laurent Vinatier, një këshilltar në Qendrën për Dialog Humanitar (HD), është arrestuar në Rusi”, tha një zëdhënës i organizatës joqeveritare për agjencinë e lajmeve AFP.

“Ne po punojmë për të marrë më shumë detaje të rrethanave dhe për të siguruar lirimin e Laurent,” shtoi ai.

OJQ-ja thekson se aktiviteti i saj kryesor është “të parandalojë dhe zgjidhë konfliktet e armatosura në mbarë botën përmes ndërmjetësimit dhe diplomacisë diskrete”.

Franca nuk bëri asnjë koment të menjëhershëm për këtë çështje. Lidhjet midis Parisit dhe Moskës janë të tensionuara për shkak të pushtimit të plotë të Ukrainës nga Rusia në vitin 2022.

Në një deklaratë të enjten, SK tha se ishte hapur një çështje penale dhe mbi të dyshuarin do të ngriheshin shumë shpejt akuzat. Francezi, kishte vizituar vazhdimisht Rusinë për disa vite, duke mbajtur takime me shtetas rusë.

Videoja prej 19 sekondash e publikuar nga SK tregon një burrë, fytyra e të cilit është e turbullt, duke u arrestuar nga oficerët rusë të zbatimit të ligjit, përpara se të çohej në një furgon SK.

Francezi akuzohet gjithashtu se nuk ka dorëzuar dokumentet e nevojshme për “përfshirjen në regjistrin e agjentëve të huaj”. Rusia kërkon që kushdo që merr mbështetje të huaj ose është nën ndikim nga jashtë, të deklarohet si agjent i tillë.

Ajo ka përdorur ligjin e vitit 2012 për të shtypur çdo kundërshtim brenda vendit ndaj Presidentit Vladimir Putin, dhe gjithashtu si një pretekst për të arrestuar njerëz, përfshirë të huajt.

Vitin e kaluar, gazetarja ruso-amerikane Alsu Kurmasheva u arrestua me një akuzë të ngjashme. Akuza parashikon burgim deri në pesë vjet. BBC

/rtsh.al/