Rusia ka akuzuar Ukrainën se qëndron pas një sulmi me dron që dëmtoi të paktën dy ndërtesa në Moskë herët në mëngjesin e të hënës.

Ministria ruse e mbrojtjes tha se dy drone u “shtypën dhe u rrëzuan”, duke shtuar se nuk kishte viktima.

Agjencia shtetërore ruse e lajmeve Tass raportoi se një dron ra pranë ministrisë së mbrojtjes ndërsa zyrtarët ukrainas ende nuk kanë komentuar.

Kryebashkiaku i Moskës Sergei Sobyanin tha se sulmet me dron goditën ndërtesa “jo-rezidenciale” rreth orës 04:00 me orën lokale. Ai shtoi se ndërtesat nuk kanë pësuar ndonjë dëmtim të madh.

Moska e ka akuzuar Ukrainën për një mori sulmesh me dronë në territorin e saj në muajt e fundit.

Incidenti i së hënës vjen vetëm një ditë pasi Rusia shënjestroi qytetin ukrainas të Odesës me sulme të reja raketore, duke shkatërruar Katedralen historike.

Unesco, agjencia kulturore e OKB-së, tha se ishte “thellësisht e tronditur dhe dënon me termat më të ashpër” sulmin në qendrën historike të Odesa.

/rtsh.al/