Disa raketa të tjera janë lëshuar nga Rusia në drejtim të qytetit qendror të Ukrainës, Kryvyi Rih, duke vrarë të paktën dy persona dhe duke plagosur 20 të tjerë.

Ministri i Punëve të Brendshme të Ukrainës, Ihor Klymenko bëri me dije se një ndërtesë shkolle katërkatëshe u godit dhe pjesë të kateve të katërt deri në të nëntë të një kulle banimi aty pranë u shkatërruan.

Klymenko paralajmëroi banorët të qëndrojnë në strehimore derisa të fikej alarmi i sulmit ajror. Në lidhje me ngjarjen, reagoi dhe Presidenti ukrainas, Volodymyr Zelensky, i cili u shpreh se po bëhen të gjitha përpjekjet që të shpëtohen të gjithë qytetarët që janë plagosur dhe kanë mbetur poshtë rrënojave.

“Ne po përpiqemi të shpëtojmë sa më shumë njerëz të jetë e mundur”, tha Presidenti Volodymyr Zelensky në Twitter.

Zelensky tha se sulmi në Kryvyi Rih ishte pjesë e një bombardimi rus në të cilin “armiku ka sulmuar me kokëfortësi qytete, qendra të qyteteve, duke bombarduar objekte civile dhe banesa”.

“Por ky terror nuk do të na trembë apo na thyejë. Ne po punojmë dhe po shpëtojmë njerëzit tanë”, shtoi ai.

/rtsh.al/