Për herë të dytë në pak më shumë se një muaj, udhëheqësi republikan i Senatit Mitch McConnell ngriu teksa fliste me gazetarët.

Në një konferencë shtypi në Covington, Kentaki, 81-vjeçari ngriu për më shumë se 30 sekonda teksa u pyet nëse do të kandidonte për rizgjedhje në vitin 2026.

Stafi ndihmës u afrua menjëherë pranë senatorit, dhe u përpoqën që ta nxisnin të fliste, por u deshën disa sekonda të tjera që McConnell të rimerrte veten.

Ai nuk bëri asnjë koment për shëndetin e tij, përpara se të largohej me ndihmësit.

“Udhëheqësi McConnell u ndje për momentin i lehtësuar dhe u ndal gjatë konferencës së tij për shtyp sot”, tha një zëdhënës pas incidentit.

Një punonjës i stafit tha më vonë se ligjvënësi ndihet mirë, por do të konsultohet me një mjek përpara daljes së tij të ardhshme.

‘Ndalimi i parë verbal’ i McConnell ndodhi gjatë një konference shtypi në Kapitolin e SHBA-së në Uashington DC më 26 korrik, ku ngriu për rreth 20 sekonda, përpara se të largohej nga kolegët e tij senatorë republikanë.

McConnell, i cili udhëheq pakicën e ngushtë të partisë republikane në dhomën e sipërme të Kongresit, u shtrua në spital për një javë pasi pësoi një tronditje dhe një frakturë në brinjë pas një rënieje jashtë një hoteli në zonën e Uashingtonit në mars.

Ai u transferua në një institucion rehabilitimi dhe nuk u kthye në Senat deri në mes të prillit.

Pas incidentit të ngrirjes në korrik, mediat amerikane raportuan se McConnell ka duruar të paktën tre rënie të tjera që nga shkurti.

/rtsh.al/