Shtetet e Bashkuara dhe forcat aleate kanë ndërmarrë sulme të gjera ajrore kundër Shtetit Islamik në Siri, si përgjigje ndaj vrasjes së tre amerikanëve muajin e kaluar. Ushtria amerikane konfirmoi se dhjetëra objektiva të IS-it u goditën mbrëmjen e së shtunës, kryesisht në zona rurale. Operacioni, sipas CENTCOM-it, lidhet drejtpërdrejt me sulmin në Palmira ndaj forcave amerikane dhe siriane.

Në këto goditje morën pjesë edhe forcat ajrore të Jordanisë, që shënjestruan disa pozicione brenda territorit sirian. Shefi i mbrojtjes i SHBA-së deklaroi se sulmi ndaj amerikanëve nuk do të mbetet pa përgjigje. Pentagoni ka bërë të ditur se prania ushtarake amerikane në Siri do të reduktohet gradualisht, edhe pse kërcënimi i IS-it mbetet aktiv.

Paralelisht, tensione të forta janë shënuar edhe në Alepo, ku forcat kurde njoftuan për një armëpushim me qeverinë siriane. Pas disa ditësh përplasje, palët ranë dakord për tërheqjen e forcave kurde nga lagjet Sheikh Maqsud dhe Ashrafiyeh. Ushtria siriane tha se operacionet në këto zona kanë përfunduar dhe se luftëtarët kurdë po transportohen drejt veriut.

Forcat Demokratike Siriane sqaruan se marrëveshja lejoi largimin e civilëve të bllokuar dhe të plagosurve. Gazetarë në terren raportuan për autobusë që largonin persona nga zonat e konfliktit, nën masa të rrepta sigurie. Fillimisht, pala kurde mohoi tërheqjen, duke e cilësuar lëvizjen si zhvendosje të detyruar. Përplasjet në Alepo kanë shkaktuar të paktën 21 viktima civile dhe kanë detyruar rreth 155 mijë persona të largohen nga shtëpitë.

Familje të tëra u panë duke u larguar me nxitim, ndërsa disa të rinj u ndanë nga turma për verifikime. Shtetet e Bashkuara dhe Bashkimi Europian kanë bërë thirrje për rikthim në dialog politik. Situata në Siri mbetet e brishtë dhe e tensionuar, me frikën e një përshkallëzimi të ri.

Gazetar: A. Mata

/rtsh.al/