Shefi i mbrojtjes i Rusisë pretendoi sot se Ukraina po përgatiste një “provokim” që përfshin një pajisje radioaktive, pretendim i cili u hodh poshtë me forcë nga zyrtarët ukrainas dhe britanikë, në mes të tensioneve në rritje ndërsa Moska përpiqet të frenojë përparimet e Ukrainës në jug.

Ministri rus i Mbrojtjes, Sergei Shoigu, i bëri këto akuza në biseda telefonike me homologët e tij nga Britania, Franca dhe Turqia. 

Ai foli sërish me sekretarin amerikan të Mbrojtjes Lloyd Austin, në një telefonatë të dytë të tyre në tre ditë, por një lexim i shkurtër rus i asaj telefonate nuk tha nëse u përmend pretendimi i bombës.

Ministria ruse e mbrojtjes tha se Shoigu shprehu shqetësim rreth “provokimeve të mundshme ukrainase që përfshijnë një “bombë të pistë”, një pajisje që përdor eksplozivë për të shpërndarë mbetjet radioaktive. 

Nuk ka efektin shkatërrues të një shpërthimi bërthamor, por mund të ekspozojë zona të gjera ndaj ndotjes radioaktive.

Autoritetet ruse, në mënyrë të përsëritur, kanë deklaruar  pretendime se Ukraina mund të shpërthejë një bombë të pistë në një sulm me flamur të rremë dhe të fajësojë Moskën për të. 

Autoritetet ukrainase, nga ana tjetër, kanë akuzuar Kremlinin për hartimin e një plani të tillë.

Sekretari britanik i Mbrojtjes, Ben Wallace, e hodhi poshtë me forcë pretendimin e Shoigu dhe paralajmëroi Moskën që të mos e përdorte atë si një pretekst për përshkallëzim. Apnews

/rtsh.al/