Dy persona u prangosën në Fier, babë e bir, pasi dispononin një mjedis, te i cili kishin fshehur armë zjarri, municione dhe lëndë narkotike.

Policia e Fierit raportoi të mërkurën, se në pranga ranë: Adiol Hada 34-vjeç dhe Asqeri Hada 61-vjeç, pasi pas një hetimi më shumë se një mujor, u faktua se, në fshatin Suk të  Roskovecit ata ushtroni aktivitetin.

Djali 34-vjeçar shiste drogë dhe posedonte armë zjarri, ndërsa babai 61-vjeçar ruante në banesë armët, drogën dhe municionet.

Nga kontrolli i banesës dhe i lokalit në pronësi të tyre, shërbimet e Policisë gjetën 17.6 kg lëndë të dyshuar narkotike kanabis sativa, e përpunuar dhe e ndarë në doza gati për shitje, 2 armë zjarri pistoletë, 2 armë zjarri automatike, 2 granata luftarake, 1110 fishekë luftarakë të kalibrave të ndryshëm, 2 aparate celularë dhe 1 motomjet, të cilat u sekuestruan në cilësinë e provës materiale.

Policia thotë se, në bashkëpunim me Prokurorinë vijon puna për dokumentimin e plotë ligjor të këtij rasti, pasi ende nuk dihet nëse ata ishin pjesë e ndonjë grupi kriminal.

Babë e bir akuzohet për disa vepra penale: “Prodhimi dhe shitja e narkotikëve” dhe “Mbajtja pa leje dhe prodhimi i armëve shpërthyese dhe municionit”.

Gazetare: Flutura Tota

/rtsh.al/