Shpërthimi në sheshin Taksim në Stamboll është cilësuar nga autoritet turke si terrorist dhe i bërë nga një grua.

Zëvendëspresidenti turk Fuat Oktay tha se shpërthimi që vrau 6 persona dhe plagosi 81 të tjerë konsiderohet sulm terrorist dhe një grua ka vendosur bombën në rrugë, që është kapur nga kamerat e sigurisë.

“Ne e konsiderojmë atë si një akt terrorist si rezultat i një sulmuesi, të cilin ne e konsiderojmë si një grua, duke shpërthyer bombën. U konstatua se një femër sulmuese shpërtheu bombën. Ngjarja po hetohet dhe po bëhen vlerësimet e nevojshme. Deri më tani kemi humbur 6 persona, 4 prej tyre në pikën e sulmit. Kemi 81 të plagosur. Hetimet në vendngjarje vijojnë me shpejtësi. Do të arrijmë në fund shumë shpejt. Kushdo që qëndron pas do të mbajë përgjegjësi”, tha Oktai.

Autoritetet kanë vëzhguar të gjitha kamerat e sigurisë ku do të identifikohen të gjithë përgjegjësit dhe të ndëshkohen. 

Të tjera detaje janë zbuluar nga ministri i Drejtësisë së Turqisë, Bekir Bozdag, i cili tha se gruaja që dyshohet se shpërtheu bombën u ul në një stol, priti 45 minuta para se të ngrihej dhe më pas bomba shpërtheu.

“Një grua ulet në një stol për rreth 45 minuta dhe shpërthimi ndodh menjëherë pasi ajo ngrihet. Kjo është një zonë e zgjedhur posaçërisht. Ka persona, të cilët mund të kenë dashur t’i dërgojnë një mesazh botës. Turqia është një shtet i fuqishëm. Turqia tani është një vend që vazhdon luftën kundër terrorizmit jashtë kufijve të saj. Ne nuk duhet të bëjmë dallimin mes terroristëve të huaj dhe atyre vendas”, tha ai.

/rtsh.al/