Sipërmarrjet shqiptare që operojnë në sektorin e bujqësisë dhe  agropërpunimit do të jenë të pranishëm në edicionin e 89-të të Panairit Ndërkombëtar Bujqësor, që zhvillohet në Novi-Sad, Serbi, nga data 21 deri 27 maj 2022, njofton ATSH.

Ku aktivitet vjen në kuadër edhe të nismës “Ballkani i Hapur”, që shënon një progres të madh në lehtësimin e tregtisë së produkteve bujqësore dhe produkteve ushqimore të përpunuara.

Në forcim të kësaj nisme do të organizohet stenda e përbashkët për kompanitë që vijnë nga Shqipëria dhe Maqedonia e Veriut.

Ministria e Bujqësisë dhe Zhvillimit Rural, bën të ditur se ky panair synon të kontribuojë në rrjetëzimin e mëtejshëm të kompanive dhe nxitjen e tregtisë për produktet e prodhuara në një nga tre shtetet anëtare.

Stenda për kompanitë shqiptare që ekspozojnë prodhimet e tyre në këtë panair, është pa pagesë, ndërsa eventi do të shoqërohet me takime bilaterale mes sipërmarrësve.