Vora, deri pak minuta më pare, duket se ka qenë epiqendra e akuzave të PD-së ndaj PS- LSI, lidhur me administrimin e procesit zgjedhor. Për këtë PD ka bërë edhe një padi penale ndaj 5 anëtarëve të KZAZ, Vorë. Lidhur me këtë situatë, në KZAZ-në Vorë, ka shkuar edhe vetë kreu i KQZ-së, Ilirjan Celibashi.

Ky i fundit, pasi është njohur me situatën, në lidhje me mospranimin e propozimeve të PD për kryetar komisionesh në 22 qendra votimi në Vorë, është shprehur se KZAZ ka respektuar ligjin.

“Nga pikëpamja procedural, vendimet e tyre kanë qenë në rregull. Nuk ka lidhje me kërkesat e KQZ, plotësimi i kërkesave të ligjit për të patur komisonerë në qendrat e votimit. Është zgjedhje e subjekteve politike. Rëndësi ka që propozimet për anëtarë të Komisioneve të qendrave të votimit të jenë në përputhje me Kodin Zgjedhor. Veprimtaria e anëtarëve të KZAZ është në përputhje me ligjin. Propozimet duhet të jenë në përputhje me kërkesat e Kodit Zgjedhor. Të gjitha qendrat e votimit kanë minimumin 4 anëtarë, në 25 qendra votimi ka sekretarë dhe anëtarë që janë propozuar nga PD. Në qendrat e tjera ka kuorum për të vijuar veprimtarinë, por mungon kryetari që do të duhej të propozohej nga PD”, tha Celibashi.