Presidenti, Bajram Begaj mblodhi këtë të hënë në institucionin që drejton anëtarët e Këshillit të Sigurisë Kombëtare fill pas sulmeve kibernetike që iu bënë Shqipërisë nga hakerat e shtetit iranian.

Mbledhja u zhvillua pa praninë e mediave, ku bëhet e ditur se u thirr edhe drejtoresha e Agjencisë Kombëtare të Shoqërisë së Informacionit (AKSHI), Mirlinda Karçanaj.

Në mbledhje morën pjesë kryeministri Edi Rama, ministrja e Jashtme Olta Xhaçka, ministri i Mbrojtjes Niko Peleshi, ministri i Brendshëm Bledi Çuçi etj.

Kjo mbledhje u thirr pas disa sulmeve që u regjistruan në sistemet qeveritare, ku i pari u regjistrua në muajin korrik, ku u goditën portalet qeveritare të shërbimeve online, ndërsa i dyti në muajin shtator, ku u godit sistemi TIMS, që paralizoi punën në Pikat e Kalimit Kufitar të vendit.

Zyrtarisht, Shqipëria akuzoi Iranin si autor të këtyre sulmeve kibernetike, ku qeveria ndërpreu marrëdhëniet diplomatike me këtë vend dhe dëboi nga Tirana zyrtare trupi diplomatik iranian.

Edhe Shtetet e Bashkuara dënuan sulmin kibernetik ndaj aleatit të NATO-s dhe thanë se kishin arritur në përfundimin se pas tij qëndronte Irani ndërsa pak ditë më parë SHBA dorëzoi një rezolutë që dënon sulmet kibernetike të Iranit ndaj Shqipërisë dhe kërkon vazhdimin e mbajtjes para përgjegjësisë për ata që organizuan sulmet.

/rtsh/