Tuniziani që vrau tre persona të enjten në një kishë franceze,kishte mbërritur në Evropë kohët e fundit, njoftojnë burime zyrtare të cituar nga BBC.
I dyshuari, 21 vjeç, i identifikuar si Brahim Aouissaoui, kishte një dokument të Kryqit të Kuq Italian, lëshuar pasi ai arriti në ishullin Italian të Lampedusa me anije emigrantësh muajin e kaluar.
Ai u qëllua nga policia dhe është në një gjendje kritike. 
Presidenti Emmanuel Macron tha se ai ishte një “sulm terrorist islamik”. Presidenti francez tha se numri i ushtarëve që po vendosen për të mbrojtur vendet publike, të tilla si kishat dhe shkollat, do të rritet nga 3,000 në 7,000. 
Prokurorët anti-terror kanë hapur një hetim dhe Franca ka ngritur alarmin e saj të sigurisë kombëtare në nivelin më të lartë.
Ngjarja e Nisës ka rritur tensionet në Francë. Mbrojtja që presidenti Macron po i bën të drejtës për të botuar karikaturat dhe përpjekjet e qeverisë për të goditur Islamin radikal, kanë zemëruar Turqinë dhe vendet e tjera me shumicë myslimane.
Presidenti francez Emmanuel Macron thotë se Franca “nuk do të dorëzohet kurrë”.