Të paktën 18 të vdekur si pasojë e shiut të dendur që shkaktoi përmbytje dhe rrëshqitje dheu në Brazil

Botë | 5 vite më parë

Të paktën 18 persona, duke përfshirë shtatë fëmijë, kanë vdekur që nga e premtja pasi shiu i madh goditi Sao Paulo, duke shkaktuar përmbytje dhe rrëshqitje të dheut në të gjithë shtetin brazilian.

Rreth 500 persona janë zhvendosur gjithashtu, sipas një deklarate të lëshuar nga Mbrojtja Civile e Shtetit, dhe pesë persona janë ende të zhdukur.

Autoritetet kanë vendosur një grup pune të zjarrfikësve, policisë ushtarake dhe personelit të mbrojtjes civile për të mbështetur kryetarët e bashkive të qyteteve që janë prekur, tha të dielën guvernatori i São Paulo, João Doria.

Imazhet nga komuna e Franco da Rocha treguan pjesë të rrugëve kryesore të zhytura në ujë, ndërsa të tjerat tregonin punëtorët e shpëtimit që gërmonin nëpër mbeturina në kërkim të të mbijetuarve dhe sendeve të vlefshme pasi një rrëshqitje dheu shkatërroi shtëpitë.

Rreth 15 milionë realë (rreth 2.8 milionë dollarë) do të ndahen për 10 bashkitë më të prekura, sipas një deklarate nga zyra e Doria.

“(Fondet) mund të përdoren për të riparuar problemet kronike urbane në komunat që krijojnë shqetësime si pikat e përmbytjeve dhe rrëshqitjet e dheut,” thuhet në deklaratë.

Pjesa jugore e Brazilit ka përjetuar një rritje të reshjeve mesatare, si dhe ngjarje ekstreme shiu, që nga vitet 1960, pjesërisht për shkak të rritjes së emetimeve globale të gazeve serrë dhe varfërimit të shtresës së ozonit të atmosferës, sipas Panelit Ndërqeveritar për Klimën.

Intensiteti dhe shpeshtësia e ngjarjeve ekstreme të shiut dhe përmbytjeve pritet të rritet në këtë zonë sa më shumë të ngrohet Toka.

Brazili verilindor gjithashtu po lufton me shira të dendur që nga dhjetori./CNN

Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.

Komentet 0

Ende nuk ka komente. Bëhuni i pari që komenton.