Dy persona kanë humbur jetën dhe gjashtë të tjerë kanë mbetur të plagosur në Auckland të Zelandës së Re, pasi një person hapi zjarr në qendër të qytetit. Ngjarja u regjistrua vetëm disa orë përpara se qyteti të nisë Kupën e Botës FIFA për femra. Autori i sulmit humbi jetën pasi u qëllua nga policia, ndërsa motivet e këtij sulmi mbeten ende të paqarta.

Kryeministri i vendit, Chris Hipkins tha se sulmi nuk po shihej si një akt terrorist, duke theksuar se turneu do të vazhdojë siç ishte planifikuar.

Sipas kryebashkiakut të Auckland, Wayne Brown, i gjithë personeli i FIFA-s dhe ekipet e futbollit janë të sigurt.

“Nuk më kujtohet që diçka e tillë të ketë ndodhur ndonjëherë në qytetin tonë të bukur. Ngjarjet e këtij mëngjesi kanë qenë tragjike dhe shqetësuese për të gjithë banorët e Auckland-it, pasi kjo nuk është diçka me të cilën jemi mësuar,” shkroi Brown në Twitter.

Ndeshja hapëse e Kupës së Botës do të zhvillohet mes Zelandës së Re dhe Norvegjisë në Eden Park të qytetit.

Ministri i Sportit, Grant Robertson tha se do të ketë polici shtesë në zonë për të garantuar siguri.

Kupa e nëntë e Botës për Femra po bashkëorganizohet nga Zelanda e Re dhe Australia./ BBC

/rtsh.al/