Presidenti i Shteteve të Bashkuara, Donald Trump, ka shkarkuar sot Prokuroren e Përgjithshme Pam Bondi nga detyra e saj si shefe e Departamentit të Drejtësisë.

Trump e konfirmoi vendimin personalisht në një postim në “Truth Social”, ku e përshkroi Bondin si “një patriote e madhe amerikane dhe një mike besnike”, e cila ka shërbyer me besnikëri si Prokurore e Përgjithshme gjatë vitit të kaluar.

Ai shtoi se ajo do të kalojë në një “pozitë të re të rëndësishme në sektorin privat”, ndërsa zëvendësi i saj, Todd Blanche, do të marrë detyrën si Prokuror i Përgjithshëm në detyrë.

Sipas burimeve të shumta të administratës, shkarkimi vjen pas muajsh frustrimi të akumuluar nga ana e Presidentit Trump ndaj performancës së Bondit, veçanërisht në lidhje me trajtimin e dosjeve të Jeffrey Epstein-it – një çështje që është kthyer në një barrë politike për administratën.

Pam Bondi, e cila u konfirmua në detyrë në vitin 2025 me një votim të ngushtë në Senat, ishte zgjedhja e dytë e Trump-it për këtë post pas tërheqjes së Matt Gaetz-it.

Ajo konsiderohej një aleate e ngushtë e Presidentit, por burimet thonë se Trump ka shprehur vazhdimisht pakënaqësi me aftësinë e saj për të ekzekutuar vizionin e tij, transmetojnë mediat amerikane.

Ky është shkarkimi i dytë i një anëtari të lartë të kabinetit në mandatin e dytë të Trump-it, pas largimit të Sekretares së Sigurisë Kombëtare Kristi Noem.

Ndërkaq, zëvendësprokurori i Përgjithshëm Todd Blanche pritet të drejtojë përkohësisht institucionin derisa të emërohet një zëvendësues i përhershëm.

/rtsh.al/