Diplomatë të lartë të Koresë së Jugut, Kinës dhe Japonisë kanë rënë dakord këtë të martë që udhëheqësit e vendet të tyre të takohen në një samit trepalësh sa më shpejt të jetë e mundur. 

Në vitin 2008, tre vendet kishin rënë dakord të takoheshin çdo vit për të nxitur bashkëpunimin rajonal, por kjo iniciativë u la në hije për shkak të mosmarrëveshjeve dypalëshe dhe pandemisë së covid 19. Samiti më i fundit u mbajt në 2019-ën.  

Ministria e jashtme koreano-jugore u shpreh në një deklaratë se po diskutohet data kur do të mbahet samiti, dhe se ministrat e jashtëm të tre vendeve do të takohen brenda pak muajsh. 

Ministrja e jashtëm japoneze, Joko Kamikaua (Yoko Kamikawa), ndërkohë u shpreh se tre vendet ishin të të njëjtit mendim  për nevojën për të rifilluar bisedime të nivelit të lartë mes tyre. “Besoj se është shumë me vlerë të diskutohen sfidat e ndryshme me të cilat po përballet rajoni”, u shpreh ajo për gazetarët. 

Seuli dhe Tokio ndërkohë ranë dakord këtë vit për t’i dhënë fund mosmarrëveshjeve ligjore, diplomatike dhe tregtare mes tyre mbi çështje që e kanë origjinën që nga pushtimi japonez i Koresë në vitet 1910-45. 

Gazetare Elda Pepa

/ rtsh /