Deklaratat e bëra këtë javë nga presidenti bjellorus, Aleksandër Lukashenko, kanë rindezur frikën se ushtria e tij mund të bashkohet me forcat ruse në luftën e Moskës kundër Ukrainës. Por udhëheqësi autoritar duket se nuk dëshiron t’i japë trupat e tij, pavarësisht presionit të perceptuar nga Moska. Rusia e ka përdorur Bjellorusinë, aleatin e saj të gjatë dhe të varur, si një terren për të dërguar trupa dhe raketa në Ukrainë. 

Analistët thonë se nëse ushtria e vogël dhe e papërvojë e Bjellorusisë mund të ndihmojnë Moskën të ndërpresë disa korridore kryesore të transportit, por me gjasë nuk do të rrisë ndjeshëm aftësitë e presidentit rus Vladimir Putin në fushën e betejës.

“Ushtria bjelloruse është e dobët dhe e demotivuar, dhe nuk është e gatshme të luftojë me Ukrainën, që do të thotë se Lukashenko do të përpiqet t’i japë Putinit gjithçka përveç ushtarëve bjellorusë,” tha për Associated Press analisti ushtarak ukrainas Oleh Zhdanov. 

“Lukashenko po i bën të ditur Putinit: “Unë do të ndihmoj, por nuk do të luftoj”.

Lukashenko njoftoi se ai dhe Putin ranë dakord të krijonin një “grupim rajonal të trupave” të përbashkët dhe se disa mijëra ushtarë rusë do të vendosen në Bjellorusi. Lukashenko nuk ofroi detaje se ku do të vendosen trupat dhe motivet e Rusisë nuk ishin menjëherë të qarta, megjithëse vërejtjet vijnë pasi Moska po përpiqet të plotësojë trupat e humbura në fushën e betejës. Apnews

/rtsh.al/