Vendet e NATO-s kanë rënë dakord përpara samitit që përcakton një objektiv për rritjen e shpenzimeve vjetore të mbrojtjes dhe sigurisë në 5% të PBB-së deri në vitin 2035, duke kapërcyer kundërshtimin e Spanjës.

Në një deklaratë të përbashkët përpara samitit theksohet se vendet e NATO ranë dakord të ndërmarrin këtë hap pavarësisht se Spanja doli kundër.

Deklarata u miruta nga të 32 anëtarët e NATO-s, por do të bëhet zyrtare vetëm pasi të miratohet nga udhëheqësit, përfshirë Presidentin e SHBA-së Donald Trump, në samitin që do të mbahet në Hagë ditën e mërkurë.

DPA ka konfirmuar se shtetet anëtare të NATO-s arritën marrëveshjen mbi objektivat e planifikuara të shpenzimeve të mbrojtjes vetëm disa ditë para samitit kyç në Hagë.

Nuk dihet ende se si u bind Spanja të hiqte dorë nga kundërshtimet e saj.

Konsensusi mbi objektivin prej 5% të PBB-së mund të konsiderohet një fitore për Donald Trump, i cili ka kërkuar prej muajsh që Aleatët të angazhohen për të rritur ndjeshëm buxhetet e tyre të mbrojtjes.

Spanja kishte kundërshtuar publikisht propozimin e NATO-s për të rritur shpenzimet e mbrojtjes në 3.5% të PBB-së dhe shpenzimet e lidhura me sigurinë në 1.5% të PBB-së.

Trump u përgjigj se “NATO do të duhet të merret me Spanjën”.

Kryeministri spanjoll Pedro Sánchez i kishte dërguar një letër Sekretarit të Përgjithshëm të NATO-s Mark Rutte duke i kërkuar atij të merrte në konsideratë një “formulë më fleksibël” për shpenzimet e mbrojtjes.

/rtsh.al/