Ursula von der Leyen, Presidentja e Komisionit Evropian ka zhvilluar bisedën e saj të parë telefonike për vitin e ri me presidentin ukrainas Volodymyr Zelenskyy, duke thënë se mezi pret të vizitojë sërish Ukrainën.

Ursula von der Leyen shprehu mbështetjen e plotë për Ukrainën dhe dërgoi urimet e saj më të mira për këtë vit, duke premtuar se do të vazhdojë të ofrojë ndihmë praktike nga Bashkimi Evropian.

Ajo tha se Bashkimi Evropian së shpejti do të fillojë disbursimin e fondeve nga paketa e miratuar 18 miliardë euro e ndihmës makrofinanciare për Ukrainën në këste mujore.  

Presidentja e Komisionit Evropian theksoi se “BE qëndron pranë jush, për aq kohë sa duhet. Ne mbështesim luftën tuaj heroike. Një luftë për liri dhe kundër agresionit brutal,” shkroi ajo në Twitter, me pas shtoi se shpreson të takojë Zelenskyy së shpejti në Ukrainë. Vetë Volodymyr Zelenskyy e ka konfirmuar bisedën, duke theksuar se kjo ka qenë edhe telefonata e tij e parë zyrtare në vitin e ri.

/rtsh.al/