Policia e Durrësit ka zbuluar bashkëpunëtorin e 34 vjeçarit Esmerald Balla, për vrasjen e babait të këtij të fundit, 62-vjeçari Enver Balla.

Ky i fundit u vra nga djali i tij, i cili u ndihmua nga 25-vjeçari E.B., për transportimin e trupit të pajetë nga banesa drejt pusit, ku u gjet nga policia.

“Në vijim të veprimeve hetimore të pandërprera, lidhur me ngjarjen e ndodhur në fshatin Shënavlash, ku djali vrau me armë zjarri babain e tij dhe e deklaroi të larguar nga banesa, duke pretenduar se kishte humbur kontaktet me të, veprimet janë intensifikuar dhe si rezultat është bërë i mundur identifikimi, kapja dhe arrestimi i bashkëpunëtorit të tij, shtetasit E. B., 25 vjeç, banues në Sektor Rinia, Durrës.

Ky shtetas, i cili kishte lidhje shoqërore me autorin E. B., dyshohet se ka bashkëpunuar me të në transportimin me automjet të trupit të viktimës nga vendi i ngjarjes deri te vendi ku u gjet nga policia”, thuhet në  njoftim.

Gjatë kontrollit në banesën e 25-vjeçarit, u gjet dhe u sekuestrua një shumë prej 145 mijë lekësh.

25-vjeçari u arrestua për veprat penale “Moskallëzim i krimit”, “Veprime që pengojnë zbulimin e së vërtetës” dhe “Fshehja ose asgjësimi i kufomës”.

Ngjarja u zbulua një ditë më parë, ndërsa 34-vjeçari pas arrestimit ka pranuar krimin e rëndë. Ngjarja e rëndë fillimisht u denoncua në polici si humbje e të afërmit. 

/rtsh.al/