Vrasja e Renee Good në Minneapolis nga agjentët e emigracionit (ICE) ka shërbyer si shkëndijë për një valë të re zemërimi që ka kapërcyer kufijtë e Minesotës. Të enjten, dy incidente të reja që përfshijnë agjentët federalë tronditën Portlandin dhe Connecticutin, duke rritur presionin mbi administratën dhe operacionet e zbatimit të ligjit.

Portland, Oregon, të shtëna jashtë spitalit

Një tjetër incident me armë zjarri që përfshin oficerët federalë ndodhi pasditen e së enjtes në Portland, jashtë ambienteve të një spitali. Bilanci: dy persona mbetën të plagosur. Gjendja e tyre shëndetësore nuk dihet ende.

Departamenti i Sigurisë Kombëtare (DHS) ka përdorur një mbrojtje të ngjashme me atë të rastit në Minneapolis. Sipas tyre, oficerët u detyruan të qëllojnë pasi një i dyshuar (shtetas nga Venezuela me lidhje të dyshuara me bandat) tentoi të përdorte automjetin e tij si armë për të goditur agjentët.

Zyra e FBI-së në Portland ka marrë menjëherë drejtimin e hetimeve.

Hartford, Connecticut, tension gjatë protestave

Zemërimi qytetar u përshkallëzua edhe në Bregun Lindor. Kryebashkiaku i Hartfordit, Arunan Arulampalam, denoncoi një incident ku një automjet i drejtuar nga oficerë federalë u fut përmes turmës së protestuesve jashtë ndërtesës federale “Abraham Ribicoff”.

Videot tregojnë protestuesit duke bllokuar daljen e një furgoni dhe një makine. Mjetet çanë turmën ngadalë, ndërsa protestuesit thyen një xham dhe u raportua përdorimi i sprejit lotsjellës.

Kryebashkiaku Arulampalam akuzoi drejtpërdrejt klimën politike të kultivuar nga administrata Trump.

“Ajo që ndodhi sonte është rezultat i drejtpërdrejtë i paligjshmërisë dhe pakujdesisë së kultivuar nga administrata Trump, e cila kulmoi me vrasjen e Renee Good.”

Këto ngjarje të njëpasnjëshme kanë vendosur operacionet e ICE-së nën një lupë të fortë vëzhgimi, ndërsa protestat parashikohet të vazhdojnë.

/rtsh.al/