Të paktën gjashtë persona kanë humbur jetën si pasojë e një zjarri që ra orët e para të mëngjesit të kësaj të marte, brenda një hoteli në kryeqytetin e Zelandës së Re, Wellington.

Lajmi është bërë me dije nga Kryeministri i Zelandës së Re, Chris Hipkins, i cili u shpreh se dyshohet se shifra e viktimave mund të jetë më e lartë, raporton CNN.

“Kam pasur raporte të ndryshme, kuptoj gjashtë të konfirmuara më parë dhe duket se ka të ngjarë të ketë më shumë”, tha kryeministri i Zelandës së Re Chris Hipkins.

Zjarrfikësit kanë mbërritur menjëherë në hotel, ku kanë bërë të mundur evakuimin e 52 personave.

“Me trishtim mund të raportoj se ky do të jetë një incident me shumë fatalitet. Mendimet tona janë me familjet e atyre që kanë humbur jetën dhe me ekuipazhet tona që me guxim i shpëtojnë ata dhe u përpoqën të shpëtonin ata që nuk mundën. Pesë të tjerë u dërguan në spital, por dhjetëra të tjerë mbeten të pagjetur”, u shpreh menaxheri i Zjarrfikësve dhe Emergjencave në Wellington, Nick Pyatt.

Shkaku i zjarrit mbetet i panjohur, tha Pyatt, duke shtuar se do të ketë një hetim zyrtar për zjarrin.

Sipas autoriteteve, rreth 100 persona dyshohet se janë ende brenda ndërtesës.

/rtsh.al/