Milionave persona në Amerikën e Veriut janë këshilluar të mbajnë maska të tipit N95 kur të jenë në mjedise të jashtme për shkak të cilësisë së dobët të ajrit të shkaktuar nga zjarret intensive që kanë përfshirë Kanadanë.

Këtë të enjte, New Jorku filloi të shpërndante maska të tilla falas.

“Kjo është një situatë e përkohshme. Nuk është covid”, u shpreh guvernatorja e Nju Jorkut Kathy Hochul, e cila gjithashtu bëri të ditur se autobuzët dhe trenat e New Jorkut kishin sisteme cilësore të filtrimit të ajrit dhe prandaj ishte e sigurt të udhëtoje me to.

Edhe në Kanada banorëve iu është thënë të përdorin maska nëse do iu duhet të dalin jashtë.  Zyrtarët paralajmërojnë se rrezikshmëria që paraqet cilësia e ajrit pritet të vijojë edhe gjatë fundjavës.

 Pjesa më e madhe e tymit vjen nga Kebeku, ku 150 vatra zjarri vijojnë të jenë aktive. Më shumë se 15 mijë banorë të asaj province pritet të evakuohen. 

Në të gjithë Kanadanë, zjarret kanë djegur më shumë se 3.8 milionë hektarë tokë. SHBA ka dërguar më shumë se 600 forca zjarrëfikëse në Kanada për të ndihmuar zyrtarët e atij vendi për adresimin e situatës.

Gazetare: Elda Pepa

/RTSH/