Evertoni do të luante për herë të fundit në “Goodison Park”, por stuhia që preku Liverpulin nuk lejoi që ky takim të zhvillohej.

Për të ndjekur ndeshjen speciale, e cila do të ishte e fundit për skuadrën e Brojës në impiantin e vjetër, Mackenzie Kinsella udhëtoi nga Australia.

15-vjeçari u nis nga kontinenti i largët në një udhëtim që i ka kushtuar 2000 euro. Pasionin për Evertonin i riu e ka marrë nga nëna e tij, Rita, e cila ka lindur në Liverpul.

Mackenzie Kinsella kishte programuar për të parë ndeshjet kundër Ulves dhe Liverpul. “Kur mësova se do të shtyhej ndeshja e pranoj se u mërzita shumë. Do të isha pjesë e një historie magjike të ndqiqja derbin e fundit të zhvilluar në ‘Goodison Park’”, tregon tifozi i ri.

Po dje për 15-vjeçarin ka ardhur edhe një mesazh ngushëllimi nga Seamus Coleman. Lojtari i Everton ka ftuar djaloshin që të jetë pjesë e një seance stërvitore të skuadrës përpara se të kthehet për në Australi.