Një koalicion prej rreth 80 vendesh kërkoi të enjten rihapjen urgjente të Ngushticës së Hormuzit, duke dënuar Iranin dhe aleatët e tij Houthi për sulmet në rajon që po dëmtojnë tregtinë ndërkombëtare dhe sigurinë energjetike.

Deklarata e përbashkët u lexua nga ministri i Jashtëm i Bahreinit, Abdullatif bin Rashid Al Zayani, në kuadër të Asamblesë së Përgjithshme të Kombeve të Bashkuara (UNGA) në New York.

Sipas tij veprimet e Iranit në Ngushticën e Hormuzit vazhdojnë të kërcënojnë sigurinë ndërkombëtare he të drejtat e liritë e lundrimit.

“Ne kërkojmë rivendosjen e plotë të të drejtave dhe parimeve të lundrimit pa vonesë”, thuhet në deklaratë.

Koalicioni dënoi edhe vendimin e Houthive për të rifilluar konfliktin në Jemen, sulmet e vazhdueshme kundër Arabisë Saudite dhe sulmet e papërgjegjshme në Detin e Kuq.

Sipas deklaratës, përparimi i Houthive drejt Ngushticës së Bab el-Mandebit do të rrisë më tej rreziqet për transportin detar ndërkombëtar, sigurinë detare dhe tregtinë botërore.

Mbështetësit e deklaratës përfshijnë shtetet arabe të Gjirit dhe fuqi të mëdha perëndimore. Sipas raporteve, ministri bareinit ishte i shoqëruar nga Përfaqësuesja e Lartë e Bashkimit Evropian, Kaja Kallas, Sekretari i Përgjithshëm i Këshillit të Bashkëpunimit të Gjirit dhe përfaqësues i Lidhjes Arabe.

Deklarata thekson se kërcënimi në rajon «vazhdon të rritet» dhe thërret për rihapjen urgjente e të plotë të Ngushticës së Hormuzit, si dhe për tranzit të sigurt, të mbrojtur e pa pengesa të anijeve, pa imponim të taksave, kushteve apo pagesave të paligjshme.

Ajo kërkon shmangien e çdo ndërprerjeje të re të tregtisë botërore.

Ngushtica e Hormuzit është një nga pikat më strategjike të transportit detar botëror. Nëpër të kalon rreth një e pesta e naftës botërore, sasi të mëdha të gazit të lëngshëm natyror dhe një pjesë e rëndësishme e plehrave kimike. Kufizimet dhe sulmet e muajve të fundit kanë shkaktuar shqetësime serioze për çmimet e energjisë dhe zinxhirët globalë të furnizimit.

Si Irani ashtu edhe Houthitë e paraqesin veprimtarinë e tyre si mbrojtëse. Kriza e lidhur me Ngushticën e Hormuzit ka vazhduar prej muajsh, pas tensioneve dhe sulmeve në rajon që filluan më herët gjatë vitit 2026, dhe ka provokuar reagime të shumta diplomatike në Këshillin e Sigurimit të OKB-së dhe gjetkë.

/rtsh.al/